اللي خلاني اجي أتكلم معاكم إنهارده هو ان اوقات كتير بيمر علينا وقت ونشوف نوعية من الناس مش حسين بينا او هما بيقولوا انهم حسين لكن هما مش حسين بأي حاجة. انا ممكن اكون من الناس دي وانت ممكن تكون منهم. بس المصيبة انك تعاند نفسك ومتعترفش اننا منهم ومصمم على موقفك . مش فهمين حاجة صح ؟ انا عارف.
بس انت كان لازم تعرف ان كل كلمة بتكتبها هتتحاسب عليها.. خلي بالك ان الخضوع بالقول بقى منتشر قوي وعادي واللي يبص لهم وهو مستغرب يقولوا عليه متخلف. خلي بالك من نيتك وأسأل نفسك انا هفيد ديني بي ايه لما اعمل الموضوع ده ولا اقول الكلام ده. خلي بالك ان الشباب مش لقين شغل وفي نفس الوقت بيسعوا للزواج. خلي بالك ان الشيطان مش هيسيبك في حالك عشان انت اسمك ملتزم وبتقول نيتك كويسة وانا في منتدى اسلامي. خلي بالك ان يوم القيامة قرب. خلي بالك ومتقلش انا اعتقد في الحلال والحرام بالذات، انت مين انت عشان تعتقد في الحلال والحرام الدين ؟ خلي بالك ومتنقلش حديث من غيره سنده لأن في ناس كتير ألفت أحاديث. خلي بالك ان الوقت مهم واللي فات منه مش هتقدر تعوضة واحسن لو قمت حفظت لك قرأن ولا قرأت في كتاب حديث. خلي بالك ان ربنا مطلع عليك. خلي بالك وحاول كلامك يطابق عملك. خلي بالك ان ده كله مجرد فضفضة وكلام ناتج عن انفجار كان ممكن يحصل فيك نتيجة ان احنا في وادي وانت في وادي تاني خالص انت واحنا وانا واحد
خلي بالك انك لو فعلاً نيتك تساهم بدعوة غيرك سواء بكتابة مشاركة جديدة اوموضوع جديد، لازم تحط في اعتبارك ان اللي هيقرأ الرد ده ممكن يكون بيفكر زيك وممكن يكون لأ، ممكن يكون ضعيف النفس ولسه في طريقة للتوبة وممكن يكون قوي النفس ويستهين بمستوى كلامك، ممكن يكون عصبي وممكن يكون متفهم، ممكن يكون عاصي وممكن يكون نقي النفس طائع، ممكن يكون وممكن ميكنش.
خالي بالك انك الدعوة مش بس آيات وأحاديث بننقلها، الدعوة أسلوب وفكرة وفهم للنفس البشرية اللي قدامك عشان تقدر توظف قدراتك معاها صح وتضع لها الرد المناسب والموضوع المناسب.
خلي بالك ان ممكن الأذان يكون بيأذن دلوقتي وبيقول حى على الفلاح وانت مصمم بردوا انك تعاند نفسك ومتقمش تصلي.
خلي بالك ان الدين مش رقائق ودرس تسمعه وتستلذ بيه وخلاص ..الدين له اصول لازم تعرفها وتتعلمها..، تعرف يعني ايه لا أله الا الله ؟ تعرف أين الله ؟ تعرف هل يجوز ان تقول الله موجود أم لا يجوز ؟ تعرف ليه الأسلام هو الحق ؟ خلي بالك انك لازم تعرف عشان ده من العلم بالضرورة. خلي بالك ان ممكن يكون منظرنا موحدين لكن احنا منعرفش يعني ايه توحيد.. خلي بالك انك لازم تتعلم أسس دينك.
خلي بالك ومتمشيش وراء شيخ او داعية وانت مغمض عنيك، هما بشر زينا بالظبط وكل عالم وله ذلة، امشي معاه في الصح واذا غلط امشي انت مع الصح، الصح يعني كتاب الله وسنة رسولة.
خلي بالك واوعى حبك لشيخ او داعية معين ينسيك حبك للرسول ، وان كلنا معرضون للخطأ وفكر مرة واتنين وتلاته وقيس على سنة رسول الله واتبع الصح.
خلي بالك إن ممكن يكون الكلام شكله أسلامي وملتزم بس اللي يجي من وراه لا علاقة له بلألتزام. خلي بالك إن كثرة المدح والثناء من مداخل الشيطان. خلي بالك وحاول تتكلم في المفيد وبس. خلي بالك أنك هتتحاسب على كل كلمة كتبتها. خلي بالك إن مفيش حاجة اسمها الأعمال بالنيات كا حجة عشان تعمل اللي على مزاجك ، لأن الأعمال بالنيات على ضوابط شرع الله وليس على ضوابط وضعتها أنت لنفسك.
خلي بالك أحنا في زمن أختلط فيه الحق بالبطال بشكل غير عادي.. خلي بالك حاول تتقي الشبهات فمن أتقى الشبهات أستبرئ لدينه وعرضه. خلي بالك إن معنى الفتوى مش علقها في رقبة عالم ونام غانم.. خلي بالك إن الأساتذة والدعاة والمشايخ والعلماء بقوا كتير عشان كده مش كل من قال انا استاذ ولا داعية ولا عالم فهو عالم ويستحق نستفتيه. خلي بالك إن تقصيرك في عرض السؤال على المفتى كما هو بالظبط يعتبر خداع وتحايل على الشرع عشان تسمع إجابة أنت نفسك تسمعها، ووقتها المفتى هيكون برئ منك يوم الحساب. خلي بالك لازم سؤالك للمفتي يكون بالظبط ويشمل أدق التفاصيل.. خلي بالك أنا بحبك في الله.
خلي بالك لما تقول انا مقتنع بكذا فلازم تكون مقتنع بيه عشان هو الصح. خلي بالك وبلاش تقتنع بكذا عشان انت ميال ليه او لمجرد انه رأيك. خلي بالك وفكر في كذا من وجهك نظرك ومن وجهة نظر الطرف الأخر عشان لما تقول انا مقتنع بكذا تبقى فعلاً مقتنع بيه بجد.
اللهم إني اعوذ بك ان اكون جسراً يعبرون عليه إلى الجنة ويلقى به إلى النار
خلي بالك إن الأيام والزمن أصبح يمر كالرياح،،وهذه من علامات الساعة.. خلي بالك إنه لم يتبقى من علامات الصغرى شيء إلا وقد ظهر. خلي بالك إن من الكبرى ما بدء في الظهور. خلي بالك إن الصغار فناء أعمارهم هذه الأيام أصبح أكثر من الكبار.
خلي بالك إن لفظ صاحب لا يطلق على الزميل. خلي بالك إن الخيرين أصبحوا قلة في هذا الزمان. خلي بالك وأحسن أختيارك.
السلام عليكم ورحمة الله وبركاته
بارك الله فيك وجزاك الله كل الخير
صدقت في كل ما قلت أخي الكريم
جعله الرحمن في ميزان حسناتك يوم البعث